စစ်တပ်အနေနဲ့ ကိုယ်ပိုင် စီးပွားရေး လုပ်စရာ မလိုအပ်ပါ

by Lwin Aung Soe on Tuesday, July 17, 2012 at 6:48am ·

ပဲခူးတိုင်းဒေသကြီး ပန်းတောင်းမြို့နယ် အတွင်း အသိမ်းခံ လယ်မြေများတွင် ဝင်ရောက် ထွန်ယက်နေသည့် အလုပ်သမားများ (ဓာတ်ပုံ – Civil Political Rights Campaign Group)

စစ်တပ်အနေနဲ့ ကိုယ်ပိုင် စီးပွားရေး လုပ်စရာ မလိုအပ်ပါ 

စစ်သား ဆိုတာ စစ်တိုက်တာဖြစ်လို့ အမှန်တကယ်မှာဆိုရင် စစ်တပ်ဟာ စီးပွားရေး မလုပ်ထိုက်မှန်း လူတိုင်း သိနိုင်လောက်အောင် ရှင်းလှပါတယ်။ 

၂ဝဝ၈ အခြေခံဥပဒေမှာလည်း တပ်မတော်က စီးပွားရေး လုပ်ပိုင်ခွင့် ရှိတယ်လို့ ပြဌာန်းထားတာ မရှိပါဘူး။ 

ဒါပေမယ့် မြန်မာနိုင်ငံမှာ စစ်တပ်အချို့က စီးပွားရေး လုပ်နေကြတာကို တွေ့ရပါတယ်။ ဥပမာတခုကတော့ လယ်ယာမြေတွေကို သိမ်းပြီး သီးစားခ ယူနေတာပဲ ဖြစ်ပါတယ်။ သီးစားခ ယူတယ် ဆိုကတည်းက စီးပွားရေးနဲ့ ဆိုင်သွားပြီ ဖြစ်ပါတယ်။ 

စစ်တပ်က ကိုယ်ပိုင် စီးပွားရေးအနေနဲ့ တပ်တွင်း စိုက်ပျိုးရေး၊ မွေးမြူရေးတို့ကို လုပ်ကြတာကိုလည်း သိရပါတယ်။ စစ်သည်တွေရဲ့ ထည့်ဝင်ငွေတွေကို မတည်ပြီး “ဦးပိုင် စီးပွားရေး” ဆိုတာကို တကယ့် ကော်ပိုရေးရှင်း အကြီးစားလို လုပ်ကိုင်နေတာကိုလည်း သိရပါတယ်။

ဒီလိုစီးပွားရေး လုပ်ငန်းတွေကနေ ဝင်ငွေ ရနေမှာ ဖြစ်ပါတယ်။ ဝင်ငွေ ရနေတာအပြင် နိုင်ငံဘဏ္ဍာက အချိုးကျ ထောက်ပံ့ငွေတွေလည်း ခံစားခွင့် ရှိနေပါသေးတယ်။ စစ်တပ်အပေါ် မနာလိုစိတ်ထားတာ မဟုတ်ပါဘူး။ ပိုပြီး ကောင်းမွန်တိုးတက်စေချင်စိတ်သာ အမြဲတမ်း ထားရှိပါတယ်။ 

ဝမ်းနည်းစရာကောင်းတာတာတော့ စစ်တပ်ရဲ့ အောက်ခြေစစ်သည်တွေဟာ သူတို့ စစ်ရေးကိစ္စမှာ တဦးချင်းအနေနဲ့ မရှိမဖြစ် သုံးစွဲရတဲ့ စစ်ဝတ်စုံ၊ ဦးထုပ်၊ ဖိနပ်၊ ခါးပတ်၊ ရေဗူး အစရှိတာတွေကို သူတို့လစာငွေထဲက ဖြတ်တောက်ခံ ဝယ်ယူနေရတာမျိုး ဖြစ်ပါတယ်။ ဒါဟာ လုံးဝ မဖြစ်သင့်ပါဘူး။ စစ်သည်တွေရဲ့ နိုင်ငံအပေါ်ထားရှိတဲ့ သစ္စာနဲ့ ကျေးဇူးတရား တုန့်ပြန်မှုတွေကို လျော့ကျစေပါတယ်။ တချို့စစ်သည်တွေဆိုရင် စစ်သည်တယောက်ရဲ့  ဂုဏ်အင်္ဂါနဲ့ မညီညွတ်နိုင်တော့လောက်အောင် နွမ်းပါး ချို့တဲ့နေရှာတာကို ကြားသိရပါတယ်။ 

ဘာကြောင့် အဲဒီလိုတွေ ဖြစ်နေရသလဲ။ ထောက်ပံ့ထားတဲ့ ဘဏ္ဍာငွေနဲ့ မမျှအောင် စစ်သည်အင်အား ပိုနေလို့လား၊ အသုံးအစွဲ ကြီးနေတာတွေ ရှိနေလို့လား၊ သို့မဟုတ် အခြား ရည်ရွယ်ချက်တွေများ ရှိနေလို့လား ... မေးစရာတွေ ဖြစ်လာပါပြီ။ 

စစ်တပ်ရဲ့ အသုံးစရိတ်ကို နိုင်ငံဘဏ္ဍာမှ လုံလောက်အောင် ထုတ်ပေးထားရပါမယ်။ စစ်တပ်ကလည်း လုံလောက်အောင် သုံးစွဲရပါမယ်။ မလုံလောက်ရင် ဘာကြောင့် မလုံလောက်တာကို စိစစ်ပြီး မလိုအပ်တဲ့  စစ်ရေးကိစ္စတွေအပေါ် ကုန်ကျနေတာတွေကို ရပ်ဆိုင်းရပါမယ်။ လိုအပ်တဲ့ စစ်ရေးကိစ္စမှာ အပို သုံးစွဲနေတာ ရှိရင်လည်း လျှော့ချပစ်ရပါမယ်။ 

၂ဝ၁၂-၂ဝ၁၃ ဘဏ္ဍာရေးနှစ်မှာ ကာကွယ်ရေးအတွက် ဘဏ္ဍာငွေ ခွဲဝေပေးထားတာက လျာထားဘတ်ဂျက်ရဲ့ ၁၄ ဒဿမ ၉၄ % ဖြစ်ပါတယ်။ ကာကွယ်ရေးဘက်က မဟုတ်တဲ့ အခြားကဏ္ဍတွေ ရတဲ့ ဘဏ္ဍာငွေနဲ့ နှိုင်းယှဉ်လိုက်ရင် ဒီပမာဏဟာ အတော်များတဲ့ အချိုးအစား ဖြစ်နေပါတယ်။ 

ဒါကြောင့် ဆင်းရဲမွဲတေမှုကို တိုက်ဖျက်နေရတဲ့ မြန်မာနိုင်ငံမှာ ကာကွယ်ရေးအတွက် ဘဏ္ဍာငွေဟာ အသင့်တော်ဆုံး သုံးစွဲနိုင်တဲ့ အခြေအနေမှာသာ ရှိနေရပါမယ်။ ဒါပေမယ့် အခြားဘက်က ဝင်ငွေ တိုးလာသလောက် တပ်မတော်ရဲ့ အဆင့်အတန်းကို တိုးမြှင့်ဖို့အတွက်ဆိုရင် (သို့) တိုင်းပြည်မှာ အရေးပေါ် အခြေအနေရှိလာရင် ကာကွယ်ရေးအတွက် အထိုက်အလျောက် တိုးမြှင့် ခွဲဝေပေးရမှာ အမှန်ပါပဲ။

သမ္မတ ဦးသိန်းစိန် ဆိုရင် နိုင်ငံအတွက် ဝင်ငွေတွေ တိုးလာအောင်၊ နိုင်ငံတကာက ထောက်ပံ့ငွေ၊ ချေးငွေနဲ့ ခံစားခွင့်တွေ ရအောင် အတော်လေး ကြိုးစားပမ်းစား လုပ်ယူနေရတာကို ကောင်းကောင်းကြီး သတိထားမိပါတယ်။ နိုင်ငံ့ဝင်ငွေ တိုးလာတွေ ရှိသလို အထောက်အပံ့တွေ ရလာတာလည်း တွေ့ရပါတယ်။

ဒီမိုကရေစီ အသွင်ပြောင်းလဲရေးဟာ အတိုင်းအတာတခုအထိ တိုးတက်လာတာနဲ့အတူ ကမ္ဘာ့နိုင်ငံ တချို့က မြန်မာနိုင်ငံအပေါ် စီးပွားရေး၊ စစ်ရေးနဲ့ သံတမန်ရေး ပိတ်ဆို့ထားတာတွေကို ရုပ်သိမ်းပေးနေကြတာဖြစ်လို့ တိုင်းပြည်ဝင်ငွေနဲ့ စုစုပေါင်းထုတ်လုပ်မှု တန်ဖိုးတွေ  တိုးတက်လာမှာကို မျှော်လင့်ထားနိုင်ပါတယ်။

ဒီလိုအလားအလာကောင်းတွေကို မျှော်လင့်နိုင်စရာ ဖြစ်လာလို့ မြန်မာစစ်တပ်အနေနဲ့ ကိုယ်ပိုင် စီးပွားရေး လုပ်ဆောင်မှုတွေကို မကြာခင် အချိန်တွင်းမှာ ရပ်ဆိုင်းလိုက်ဖို့ ပြင်ဆင်သင့်ပါပြီ။

စစ်တပ်ဟာ နိုင်ငံအတွက် ခုခံကာကွယ်ပေးတာကိုသာ တိတိကျကျ လုပ်ပေးစေချင်ပါတယ်။ သဘာဝ ဘေးအန္တရာယ်တွေ ကျရောက်လာရင် ကယ်ဆယ်စောင့်ရှောက်ပေးဖို့ ပြည်သူတွေက အလိုရှိပါတယ်။  မြန်မာနိုင်ငံဟာ ပြည်ပကျူးကျော်သူတွေကို တိုက်ခိုက်တာကို တွန်းလှန်နေရတာ မဟုတ်ဘဲ ပြည်တွင်းမှာသာ ကိုယ့်နိုင်ငံသားအချင်းချင်း ငြိမ်းချမ်းရေး မယူနိုင်တဲ့ အကြောင်းရင်းကြောင့် စစ်ပွဲတွေ တိုက်ခိုက်နေရတာပဲလို့ နားလည်ထားပါတယ်။

ပြည်တွင်းငြိမ်းချမ်းရေးကိုသာ အမှန်တကယ် ရလာရင် စစ်ဆင်ရေးစရိတ်တွေ အများကြီး လျော့ကျသွားနိုင်လို့ တပ်မတော်အနေနဲ့ ပိုမိုမြှင့်မားတဲ့ အဆင့်အတန်းကို ပြုပြင်ပြောင်းလဲယူနိုင်မှာ ဖြစ်ပါတယ်။ နိုင်ငံ့ဘဏ္ဍာငွေတွေကိုလည်း အခြားလိုအပ်နေတဲ့ဘက်တွေမှာ မျှဝေ သုံးစွဲနိုင်လာမှာဖြစ်တာကြောင့် တိုင်းပြည်ဖွံ့ဖြိုးဖို့ အားကောင်းစေမှာ ဖြစ်ပါတယ်။ တနိုင်ငံလုံး ငြိမ်းချမ်းရေး ရလာရင် အကျိုးကျေးဇူး များစွာ ရှိလာမှာ သေချာပေါက်ပါပဲ။ စစ်ဆင်ရေးစရိတ်တွေ မရှိတော့လို့ အခွန်ထမ်းပြည်သူတွေရဲ့ ဝန်ထုပ်ဝန်ပိုးကို လျှော့ချနိုင်စရာ (သို့) ဖွံ့ဖြိုးရေးလုပ်ငန်းတွေမှာ ပိုမိုသုံးစွဲနိုင်စရာ ရှိပါလိမ့်မယ်။

အခုအချိန်ဟာ အရင်ကလို စစ်အာဏာရှင် အစိုးရ မဟုတ်တော့လို့ အထူးသဖြင့် ပြည်သူကို ကိုယ်စားပြုတဲ့ ရွေးကောက်ခံ လွှတ်တော်အမတ်များအနေနဲ့ စစ်တပ်ရဲ့ အခန်းကဏ္ဍမှာ လက်ရှိထက် ပိုပြီး သင့်တော်စေနိုင်မယ့် အခြေအနေသစ်တွေကို ဖန်တီးယူစေချင်ပါတယ်။ လွှတ်တော်အမတ်တွေဟာ တပ်မတော်နဲ့အတူတူ နိုင်ငံနဲ့ နိုင်ငံသားတွေဘက်က ရဲရဲဝန့်ဝန့် အကျိုးပြုပေးနေတာကို ကျနော်တို့ သိပ်မြင်တွေ့ချင်ပါတယ်။

ဒါတွေဟာ ပြည်သူလူထုက စစ်တပ်အပေါ် သွေးသားရင်းလို  ယုံကြည် အားကိုးလာနိုင်စေဖို့အတွက် ပြည်သူတဦးအနေနဲ့ အပြုသဘောဘက်ကနေ ရေးသားတင်ပြလိုက်တာပဲ ဖြစ်ပါတယ်။ စစ်တပ်ကိုသာမကပါဘူး။ သမ္မတ အပါအဝင် အခြား အစိုးရအဖွဲ့ဝင်တွေ၊ လွှတ်တော်အမတ်တွေ၊ တရားရေး မဏ္ဍိုင်ဘက်က ဝန်ထမ်းတွေ၊ အခြားဝန်ထမ်းတွေ အားလုံးအပေါ်မှာလည်း ပြည်သူတွေရဲ့ ယုံကြည်အားကိုးမှု၊ ထောက်ခံမှုတွေ ရှိစေချင်လို့ ဖြစ်ပါတယ်။

လွင်အောင်စိုး
၁၇-၇-၂ဝ၁၂

...........................

ရည်ညွှန်း

(၁) သစ်ထူးလွင် ဗီဒီယို ထွန်တုံးတိုက်ပွဲ

(၂)တောင်သူလယ်သမားများ တရားစွဲဆိုခံရခြင်း

(၃)ထွန်တုံးတိုက်ပွဲ ဆင်နွှဲသည့် လယ်သမားများ အဖမ်းခံရ

(၄) Eleven Media Group ၂ဝ၁၂-၂ဝ၁၃ ခုနှစ် ဘဏ္ဍာရေးနှစ်အတွက် ပြည်သူ့လွှတ်တော်သို့ တင်သွင်းခဲ့သော ဘတ်ဂျတ်စာရင်း
  

........................