ကြောက်၇ွံ့  ခြင်းမှ လွတ်ကင်းရေး........ ဒေါ်အောင်ဆန်းစုကြည်

Daw Aung San Suu Kyi

ချွတ်ချော်နေတဲ့ လွှတ်တော်လား

Friday, July 27, 2012 အိမ့်သံစဉ်

http://blog.irrawaddy.org/2012/07/blog-post_3103.html

ပြည်သူ့လွှတ်တော် ဥက္ကဌ သူရ ဦးရွှေမန်း။ ဓာတ်ပုံ - ဧရာဝတီ

လွန်ခဲ့တဲ့ ကြားဖြတ်ရွေးကောက်ပွဲပြီးနောက်မှာ မြန်မာနိုင်ငံရဲ့ အကြီးဆုံး အတိုက်အခံ ပါတီကြီးတခုဖြစ်တဲ့ အမျိုးသား ဒီမိုကရေစီအဖွဲ့ချုပ် (NLD) ပါတီလည်း လွှတ်တော် နိုင်ငံရေးဖြစ်စဉ်မှာ ပါဝင်လာတဲ့အတွက် ယခင်လွှတ်တော် အစည်း အဝေးတွေနဲ့ မတူပဲ ပိုပြီး တက်ကြွအသက်ဝင်တဲ့ လွှတ်တော်ဖြစ်လာမယ်လို့ အားလုံးက မျှော်လင့်နေခဲ့ကြပါတယ်။

မျှော်လင့်ထားတဲ့အတိုင်းပဲ ဥပဒေပြုရေးမှာ အမြင့်ဆုံး အဖွဲ့အစည်းလည်းဖြစ်တဲ့ လွှတ်တော် အစည်း အဝေးတွေမှာ ပြည် သူတွေတကယ်ရင်ဆိုင်နေရတဲ့ မြေသိမ်း၊ ယာသိမ်းက အစ နိုင်ငံရေးလှုပ်ရှားသူတွေကို ဖမ်းဆီးထိမ်းသိမ်းတဲ့ ပုဒ်မ ၅ (ည) အလယ် နိုင်ငံခြားရင်းနှီးမြှုပ်နှံမှုဆိုင်ရာ အဆုံး ဥပဒေတွေပြဌာန်းနိုင် ဖို့ ဆွေးနွေးတင်ပြမှုတွေနဲ့ မြိုင်ဆိုင်လာပါတယ်။

လွန်ခဲ့တဲ့ သတင်းပတ်က လွှတ်တော်ထဲမှာ ပိုပြီး လှုပ်လှုပ်ရွရွ ဖြစ်တာကတော့ မြန်မာနိုင်ငံ အပေါ် ချမှတ် ထားတဲ့ စီးပွားရေး ဒဏ်ခတ်ပိတ်ဆို့မှုတွေကို ဒေါ်နန်းဝါနုရဲ့ အမြန်ဆုံး ရုပ်သိမ်းရေး လွှတ်တော်ကနေ ဘယ်ပုဂ္ဂိုလ်ကိုမဆို ဘယ်နည်းလမ်း သုံးသည်ဖြစ်စေ ရွေးချယ်တာဝန်ပေးဖို့ အရေးပေါ် အဆိုတင်သွင်းမှုကို အခြေအတင်ဆွေးနွေးခဲ့ကြတာပါ။

အဲဒီတုန်းက ထောက်ခံဆွေးနွေးသူတွေကလည်း အာဏာရပါတီအမတ်မင်းဖြစ်တဲ့ ဦးဌေးမြင့်နဲ့ လွှတ်တော် အမတ် တချို့ဖြစ်ပါတယ်။ ဒါပေမယ့် ဒီအဆိုကို အကြေအလည်ဆွေးနွေးတဲ့ NLD လွှတ်တော်အမတ် ဦးနိုင်ငံလင်းနဲ့ အမတ် တချို့ကလည်း ထောက်ပြဆွေးနွေးခဲ့ပါတယ်။

ဒီထောက်ပြဆွေးနွေးမှုကို NLD လွှတ်တော်အမတ်တွေဖြစ်တဲ့ ဦးဝင်းထိန်နဲ့ ဦးအုန်းကြိုင်တို့ကလည်း ဆက်လက်ဆွေး လိုတဲ့အချက်တွေရှိတာကြောင့် ရှေ့က မိုက်ခလုပ် နှိပ်ပေမယ့် တနေရာက ထိမ်းချုပ်ထား လို့ ဆွေးနွေးခွင့် မရခဲ့ပါဘူးတဲ့။

အဲဒီနေ့က ဖြစ်စဉ်မှာ လွှတ်တော် ဥက္ကဌ ဦးရွှေမန်းက “ဟေ့ ကောင်တွေ ဖွင့်လိုက်လေ”လို့ ပြောယူရတဲ့ အဖြစ်ထိပါပဲ တဲ့။

ချီးမွမ်းမယ် မကြာသေးဘူး လွှတ်တော်ရဲ့ ချွတ်ချော်မှုက စ ခဲ့တယ်လို့ ပြောရမလိုပါဘဲ။

အလားတူပဲ ယမန်နေ့ က ပြည်သူ့လွှတ်တော် အစည်းအဝေးမှာတော့ လွဲချော်မှု တချို့ကို မြင်တွေ့လိုက်ရပါ တယ်။ ဒီ တခါမှာတော့ လွှတ်တော် ဥက္ကဌရဲ့ သတိပေးမှု ၂ ကြိမ်တိုင်ပဲ ရှိခဲ့တာကိုပြောရမှာပါပဲ။

အခုတခါ သတိပေးခံလိုက်ရတာကတော့ NLD လွှတ်တော် အမတ်တွေရဲ့ဆွေးနွေးချက်တွေကိုပါ။ စက်ခလုပ်ထိမ်းတဲ့ သူတွေကို မဟုတ်ပါဘူး။

ဆွေးနွေးနေတဲ့ အကြောင်းအရာကတော့ ကွတ်ခိုင် မဲဆန္ဒနယ်က ဦးတီခွန်မြတ်ရဲ့ “တိုင်းရင်းသား လူမျိုးများ၏ အခွင့် အရေး ကာကွယ်စောင့်ရှောက်သည့် ဥပဒေ ပြဌာန်းရေး” အဆိုကို ဒေါ်အောင်ဆန်းစုကြည်အပါအ၀င် လွှတ်တော် ကိုယ်စားလှယ် ၅ ဦးက ထောက်ခံ ဆွေးနွေးခဲ့ကြတာပါ။

ဒေါ်အောင်ဆန်းစုကြည်ရဲ့ ထောက်ခံဆွေးနွေးချက်တွေက အချက်အလက်နဲ့တကွ လိုတိုရှင်းဆွေးနွေးသွား တာကြောင့် ဆွေးနွေးတဲ့ အကြောင်းအရာနဲ့ သွေဖီမသွားခဲ့ပါဘူး။ အလွန်ကောင်းတဲ့ ပထမဆုံး ဆွေးနွေးချက် လည်း ဖြစ်ပါတယ်။

NLD လွှတ်တော်ကိုယ်စားလှယ် တဦးဖြစ်တဲ့ ဦးအုန်းကြိုင်က ဆွေးနွေးချက်ဟာ ပုဂ္ဂိုလ်ရေး ဆွေးနွေးချက်ဖြစ်လို့ လွှတ်တော် ဥပဒေနဲ့ မကိုက်ညီလို့ သတိပေးတာကို လက်ခံလို့ရနိုင်ပါသေးတယ်။

ဒါပေမယ့် ဦးမင်းသူ ထောက်ပြတဲ့ လွှတ်တော်ထဲက တိုင်းရင်းသားကိုယ်စားလှယ်တွေ တိုင်းရင်းသား အရေး ဆွေးနွေး နေမှုတွေမှာ ပွင့်လင်းသင့်သလောက် မပွင့်လင်းဘူးပြောတာကို ပြည်သူ့ လွှတ်တော် ဥက္ကဌကြီး ဦးရွှေမန်းက ကန့်ကွက် တာဟာ ပြည်သူ့လွှတ်တော် ဥက္ကဌရဲ့ လုပ်ပိုင်ခွင့်ကို အလွန်အကျွံသုံးစွဲလိုက် တာပါပဲ။

သတိပေး တားမြစ်မှုကလည်း အထူးသဖြင့် စစ်ဗိုလ်က စစ်သားကို အမိန့်ပေးတဲ့ ပုံစံ နဲ့ တော်တော်တူနေတာ သတိထားမိတယ်။

ယခင် စစ်အစိုးရများလက်ထက်ကတည်းက အာဏာကို အလွန်အကျွံ သုံးတဲ့ အလေ့အထက အကျင့်ပါလာခဲ့ တာကြောင့် ဖြစ်ပါလိမ့်မယ်။ ခေါက်ရိုးကျိုးနေတဲ့ အကျင့်ဆိုး အင်နားရှား ထင်ပါရဲ့။

မြန်မာနိုင်ငံက လွှတ်တော်အစည်းအဝေးတွေကို လေ့လာကြည့်မိပါတယ်။ အမျိုးသား လွှတ်တော်နဲ့ ပြည်သူ့ လွှတ်တော် ရဲ့ လုပ်ဆောင်ချက်တွေဟာလည်း ကွဲပြားပါတယ်။

မြန်မာနိုင်ငံက ပြည်သူ့လွှတ်တော် ဥက္ကဌကြီး အစည်းအဝေး တက်တာလည်း အချိန်တွေက အတော်ယူတယ်လို့ သတိ ထား မိပါတယ်။ ပြည်သူ့လွှတ်တော် ဥက္ကဌ အဆောင်အယောင် ကျိုင်းကြီးနဲ့ ပြည်သူ့လွှတ်တော် ခမ်းမထဲ ၀င်လာတာ ထွက်သွားတာ ကြည့်ပြီး တချိန် က နန်းမတော် မယ်နု ညီလာခံ ၀င်တာ ဒီလိုများလားလို့ တွေးဆ ကြည့်မိတယ်။

တခြား နိုင်ငံတကာ ဒီမိုကရေစီ လွှတ်တော်တွေ လေ့လာကြည့်ပါတယ်။ ဒီလိုမဟုတ်ပါဘူး။ လွှတ်တော် ဥက္ကဌ အစည်း အဝေးထဲ ၀င်လာရင် အားလုံး မတ်တတ်ရပ်ပြီး အရိုအသေပေးလိုက်တာပါဘဲ။ အခုတော့ မြန်မာ့ လွှတ်တော် ဥက္ကဌ ကြီးက လွှတ်တော် အရှိန်အ၀ါတွေကို ပိုသုံးနေတယ်လို့ မြင်မိတယ်။

ဦးရွှေမန်းနဲ့ အဖွဲ့ဟာ နော်ဝေအပါအ၀င် ဥရောပ ပါလီမန်တွေကို လေ့လာခဲ့တာမှာ ဘာတွေ သင်ခန်းစာ ယူလာခဲ့တယ် မသိဘူး။

အခုလို ရှေ့က ပြည်သူ့လွှတ်တော် ဥက္ကဌ ဗိုလ်ချုပ်ကြီးဟောင်း သူရ ရွှေမန်းက လုပ်ပိုင်ခွင့်တွေ ပိုသုံးနေတယ် ဆိုရင် သူ ပြောနေတဲ့ ပြုပြင်ပြောင်းလဲရေးဆိုတာ အောက်ခြေက လိုက်ပါဖို့ ဆိုတာတော့ မဖြစ်နိုင်ပဲ ရှိနေမှာပါ။

ဒီအတွက် ဦးရွှေမန်းပြောသလို လွှတ်တော်ကြီးက ပွင့်ပွင့်လင်းလင်း ပြည်သူတွေကို ချပြနေတယ်ဆိုတဲ့ စကား အတိုင်း ပြည်သူ့လွှတ်တော် ဥက္ကဌကြီး လိုက်ကိုင်ထားနေတဲ့ ၂၀၀၈ ဖွဲ့စည်းပုံ အခြေခံ ဥပဒေအရ ပြည်သူ့ လွှတ်တော် ဥက္ကဌရဲ့ လုပ်ပိုင်ခွင့်နဲ့ပတ်သက်ပြီးလည်း ပွင့်ပွင့်လင်းလင်း ချပြထားသင့်ပါတယ်။

ပြည်သူ့လွှတ်တော်ဟာ အပြောသက်သက်မဟုတ်တော့ပါဘူးဆိုတဲ့ လွှတ်တော်ဥက္ကဌ ဦးရွှေမန်းစကားက အလုပ်သက် သက်နဲ့ ပွင့်လင်းမြင်သာအောင်ပြဖုိ့ပါပဲ၊ လုပ်ပိုင်ခွင့်တွေ အလွန်အကျွံ ပိုသုံးဖို့တော့ မဖြစ်သင့် ပါဘူး။

ဒီမိုကရေစီ စနစ်မှာ အုပ်ချုပ်ရေး၊ ဥပဒေပြုရေး၊ တရားစီရင်ရေး ဆိုတဲ့ အဓိက မဏ္ဍိုင် ၃ ခုဟာ တကယ် တမ်းတော့ သီး ခြားစီ ရှိပြီး လုပ်ပိုင်ခွင့်တွေလည်း သီးခြားစီဖြစ်ရမှာပါ။ ဒီမိုကရေစီ ပြုပြင်ပြောင်းလဲရေးတွေ လုပ်နေတဲ့ မြန်မာနိုင်ငံမှာ ဒီလို တခုချင်းစီဟာ သီးခြားစီ တကယ် ရှိ၊ မရှိ က မေးခွန်းထုတ်စရာပါ။


ဆရာကို လင်းသန့်။

သင်ဘယ်လမ်းလျှောက်မလဲ

by Victor Tan on Friday, July 27, 2012 at 10:16am ·

သင်ဘယ်လမ်းလျှောက်မလဲ
(ကျန်ရှိတဲ့အာဏာရှင်လူကြီးမင်းများသို့)

မစင်ကိုနံ့သာလူး
အာဏာရူးတွေရဲ့ပုပ်နံ့
ပြန့်မထွက်ဖူးတဲ့လား။

တမာကိုသကာဖုံး
လုံးလုံးခါးတဲ့အရသာ
ချိုလာမတဲ့လား။

စိတ်ပုပ်တဲ့နှလုံးမဲ
ထုံးနဲ့ပဲသုတ်သုတ်
ပုပ်နေတဲ့နှလုံးမဲကမူ
ဖြူလာမတဲ့လား။

အပေါ်ယံကြော
ပကာသနနှောပြီး
လူတောမှာ လူချောလုပ်မယ်မကြံနဲ့
စိတ်အမှန်အကန်ရောက်မှ
သွားရာလမ်းဖြောင့်ပါမယ်

စိတ်ကောက်ကောက်နဲ့
ဘ၀လမ်း လျှောက်နေရင်
ရောက်မယ့်နေရာ တနေရာထဲသာ
မလွဲပါငြိ အမြဲသာမိနေမယ့်
အ၀ီစိငရဲသာ ဖြစ်တော့မှာ…။

ဘယ်သူတွေ တရားပျက်ပျက်
ကိုယ်မပျက်စေနဲ့တော့
အမှန်တရားဖက်
ခြေစုံခုန်ထွက်ခြင်းသာ
ကောင်းမြတ်တဲ့ဆုံးဖြတ်ချက်ပါ။

 သင်တို့ရဲ့ မလွယ်ပေါက်
 တကယ့်ထွက်ပေါက်ဟာ
 ရဲရဲတောက် ဘာမထီ
 အာဇာနည်သူရဲကောင်း
 ဒေါ်စုတို့နဲ့ပေါင်းပြီး သောင်းသောင်းဖျဖျ
 လူထုဆန္ဒအရ
 ရယူကြမဲ့ဒီမိုကရေစီ လူစုံစုံညီညီနဲ့
 ယုံယုံကြည်ကြည်ချီတက်ကြလော့။

 တက္ကသိုလ်ဘုန်းကြွယ် (ဇူလိုင်၂၆ ၂၀၁၂)

ကိုမိုးသီးဇွန် အပါအဝင် ၆ ဦးကို အာဏာပိုင်များ ပြည်တွင်းဝင်ရောက် လေ့လာခွင့်ပေး

ကိုမိုးသီးဇွန် အပါအဝင် ၆ ဦးကို အာဏာပိုင်များ ပြည်တွင်းဝင်ရောက် လေ့လာခွင့်ပေး

ပြည်တွင်းနိုင်ငံရေးအခြေအနေ လေ့လာဖို့ အမေရိကန်နိုင်ငံမှ ကိုမိုးသီးဇွန် အပါအဝင် ကိုကိုလေး၊ ကိုမူသား၊ ကိုရင်အေး၊ ကိုကိုအောင်၊ ကိုထွန်းအောင်ကျော် စတဲ့ ၆ ဦးကို မြန်မာအာဏာပိုင်တွေက ပြည်ဝင်ခွင့် ပေးလိုက်တယ်၊ ပြည်တွင်းမှာ တိုင်းပြည်ပြုပြင်ပြောင်းလဲရေးနဲ့ သက်ဆိုင်တဲ့ ကိစ္စတွေကို အာဏာပိုင်တွေနဲ့ ဆွေးနွေးဖို့ အစီအစဉ်ရှိပြီး၊ သြဂုတ်လကုန်ပိုင်းလောက်မှာ ခရီးစဉ်စမယ်လို့ သိရတယ်။

ကိုမိုးသီးဇွန် ဟာ ရှစ်လေးလုံးအရေးတော်ပုံကို စစ်တပ်က အာဏာသိမ်းခဲ့တဲ့ နောက်ပိုင်း စစ်အုစ်စု အစိုးရအဆက်ဆက် မျက်ကွယ် သေဒဏ်ချမှတ်ခြင်းခံထားရသူ ဖြစ်ပါတယ်။ ယခုလက်ရှိ သန့်ရှင်းစင်ကြယ်သော ဦးသိန်းစိန် ဒီမိုကရေစီ အစိုးရအုပ်စိုးနေတဲ့ ကာလမှာပင် အဲဒီ ပစ်ဒဏ်ကို အာဏာပိုင်တွေဘက်က ပယ်ဖျက်ပေးခဲ့ခြင်း မရှိသေးဘူး ဖြစ်ပါတယ်။

 

သတင်း ယမုံနာ ဖေ့ဘုတ်

ပါကစ္စတန် တာလီဘန်အဖွဲ့တစ်ဖွဲ့မှ ရိုဟင်ဂျာအရေးနှင့်ပတ်သက်ပြီး မြန်မာနိုင်ငံကို ခြိမ်းခြောက်မှုများပါဝင်သည့် ကြေညာချက်တစ်စောင် ထုတ်ပြန်

မူရင်းလင့် အပြည့်အစုံကိုhttp://tribune.com.pk/story/413231/taliban-threaten-myanmar-over-rohingya/မှာ ဖတ်နိုင်ပါတယ်...

ပါကစ္စတန်နိုင်ငံရှိ တာလီဘန် အစွန်းရောက်အဖွဲ့တစ်ဖွဲ့မှ ရခိုင်ပြည်နယ်တွင် ဖြစ်ပွားခဲ့သော ရိုဟင်ဂျာအရေးနှင့်ပတ်သက်ပြီး မြန်မာနိုင်ငံအပေါ် ခြိမ်းခြောက်မှုများပါဝင်သည့် ထုတ်ပြန်ချက်တစ်စောင်ကို ယနေ့တွင် ထုတ်ပြန်ကြေညာခဲ့ကြောင်း အေအက်ဖ်ပီ သတင်းဌာန၏ ဖော်ပြချက်အရ သိရသည်။

အဆိုပါကြေညာချက်ထဲတွင် ရိုဟင်ဂျာအရေးနှင့် ပတ်သက်ပြီး မြန်မာနိုင်ငံ၏ လုပ်ဆောင်မှုများအပေါ် လက်စားချေ တိုက်ခိုက်မှုများ ပြုလုပ်သွားမည်ဖြစ်ကြောင်းနှင့် ပါကစ္စတန် အစိုးရအနေဖြင့် မြန်မာနိုင်ငံနှင့် နှစ်နိုင်ငံသံတမန်ရေးရာ ဆက်သွယ်မှုများကိုလည်း ဖြတ်တောက်သွားရန်ကိုလည်း ဖိအားပေး တောင်းဆိုထားသည့်အချက်များ ပါဝင်ကြောင်း သိရသည်။ ယင်းကြေညာချက်ကို ပါကစ္စတန်ရှိ တာလီဘန်အစွန်းရောက် အဖွဲ့တစ်ဖွဲ့ဖြစ်သော Tehreek-e-Taliban Pakistan (TTP) အဖွဲ့မှ ထုတ်ပြန်ခဲ့ ခြင်းဖြစ်သည်။ ထို့အပြင် ပါကစ္စတန်နိုင်ငံမြို့တော် အစ္စလာမ်မာဘတ်ရှိ မြန်မာသံရုံးကိုလည်း ပိတ်ပစ်ရန် ယင်းကြေညာချက်ထဲတွင် ထည့်သွင်းပြောကြားခဲ့သည်။

TTP အဖွဲ့မှ Ehsanullah Ehsan က ''ကျွန်တော်တို့ ပြန်လည်လက်တုံ့ပြန်သွားပါမယ်၊ မြန်မာနိုင်ငံရဲ့ အကျိုးစီးပွားမှန်သမျှကို ဖျက်ဆီးသွားမှာဖြစ်သလို မြန်မာနိုင်ငံအပေါ် လိုလားသူတွေကိုလည်း ဆန့်ကျင်တိုက်ခိုက်သွားပါမယ်''ဟု ကြေညာချက်ထဲတွင် ထည့်သွင်းပြောကြားမှုကို အေအက်ဖ်ပီ သတင်းဌာနတွင် ဖော်ပြထားပါသည်။ အဆိုပါအဖွဲ့မှာ ပြီးခဲ့သည့် ၂၀၁၀ ခုနှစ်က မအောင်မြင်ဘဲဖြစ်ခဲ့သည့် အမေရိကန်နိုင်ငံ၊ နယူးယောက်မြို့ရှိ Times Square ကို ဗုံးခွဲတိုက်ခိုက်ရန် ကြံစည်မှုတွင် ကြိုးကိုင်ခဲ့သော အဖွဲ့အစည်းတစ်ရပ်ဖြစ်ကြောင်းလည်း သိရှိရသည်။

နိုင်ငံတော်သမ္မတ ဦးသိန်းစိန်က ရိုဟင်ဂျာများနှင့်စပ်လျဉ်း၍ ကုလသမဂ္ဂ ဒုက္ခသည်များဆိုင်ရာ မဟာမင်းကြီးမစ္စတာ အန်တိုနီယိုဂူတာရက်စ်နှင့် တွေ့ဆုံစဉ်တွင် တိုင်းရင်းသားမဟုတ်ဘဲ ခိုးဝင်လာသည့် ရိုဟင်ဂျာများကို လက်ခံရန် ဘယ်လိုမှ မဖြစ်နိုင်ကြောင်း၊ နောက်ဆုံး ဖြေရှင်းသည့်နည်းလမ်းမှာ ခိုးဝင်လာသည့် ရိုဟင်ဂျာများကို UNHCR သို့ အပ်နှံပြီး ဒုက္ခသည်စခန်းအဖြစ် ထားရှိရန်ဖြစ်ကြောင်း၊ UNHCR က ကျွေးမွေးစောင့်ရှောက်ပေးရန်ဖြစ်ကြောင်း၊ တတိယနိုင်ငံက လက်ခံမည်ဆိုလျှင် ပို့ပေးမည်ဖြစ်ကြောင်းနှင့် ဤသည်မှာ ပြဿနာဖြေရှင်းနည်းကို စဉ်းစားနေခြင်းဖြစ်ကြောင်း စသည်တို့ကို ထုတ်ဖော်ပြောကြားခဲ့ပြီးဖြစ်သည်။

ရန်အောင်
source EMG   ..။

သားပျောက် အဖေ ရဲ့ တမ်းချင်း တစ်ပုဒ် ( သားများပျောက်ဆုံး သွားခဲ့ဖူးသော အဖေများ ကိုယ်စား)

by Nay Myo Zin on Friday, July 27, 2012 at 12:03am ·

လူစိမ်းမျက်လုံးများ အောက်က ဗိုလ်ကြီးဟောင်း နေမျိုးဇင် ဆိုတဲ့ စာစုလေး အကြောင်း ယနေ့ အဖွဲ့ချုပ် (ရွှေဂုံတိုင်) ကိုရောက်တော့ အတော်များများက ၀ိုင်းပြောကြပါတယ်။ ကိုယ်ချင်းစာတဲ့ အကြောင်းနဲ့ တပ်မတော် ကို တကယ်ကောင်းစေချင်တဲ့  စေတနာ အမှန်၊ ရင်ထဲက ခံစားချက် အမှန်နဲ့တိုက်တွန်းမှု ကို လေးစားကြောင်း၊  နိုင်ငံကို ကောင်းစေချင်လို့ ကျနော်ရဲ့ ပေးဆပ် ကြိုးပမ်းမှုကို အသိအမှတ်ပြုပါကြောင်း ၊ ပါတီဝင် တချို့နဲ့ ပါတီဝင်မဟုတ်သော စစ်မှုထမ်းများ အရာရှိ အချို့ကပါ သနား ဂရုဏာသံများဖြင့် ပြောကြပါတယ်။ အခုမြန်မာပြည်ဟာ အရင် မြန်မာပြည် မဟုတ်တော့ပါဘူး။ တပ်မတော်တွင်းမှာရော အရပ်သူ အရပ်သား ပြည်သူလူထု အတွင်းမှာပါ ပွင့်လင်းလွတ်လပ်မှု တစုံတရာထိ ရှိလာပါပြီ၊

နေရာတိုင်းမှာ ကြောက်ရွံ့ဝပ်တွားမှုတွေနဲ့ ငြိမ်ကုတ်နေကြတော့သည် မဟုတ်။ မှန်သည်ကို မှန်သည်ဟု ပြောရဲလာကြပေပြီ၊ မတရားသည်ကို မတရား ဟု ပြောရဲ ဝေဖန်ရဲလာယုံတင်မက မတရားမှုကို ဘယ်သူက တိုက်ဖျက်နေပြီး၊ မတရားမှုကို ဘယ်လိုလူတွေက ကျူးလွန်နေသည်ကိုလည်း ၀န်ထမ်း ယန္တယားအတွင်းမှာ သိလာကြပေပြီ၊

အခွင့်အာဏာထိန်းချုပ် အုပ်စီးထားတဲ့ ဒါရိုက်တာတွေ ၀န်ကြီး ၀န်ကလေးတွေကို ဘုရားထူး မတတ် ကြောက်လန့်ခစား နေရသေးတဲ့ လက်ရှိ အုပ်ချုပ်ရေး စနစ်အတွင်းက အခြေအနေတွေကို သူတို့ ပြောင်းလဲလိုချင်နေကြပါပြီ။

အကြောက်တရားနဲ့ ချုပ်ထိန်း ခိုင်းစေပြီး ၊ တဖက်က အခွင့်အရေးနဲ့ ရာထူး၊ နေရာ၊ ငွေကြေးတွေနဲ့ မျှားဖြားယောင်း ကာ သိတတတ်သူ ၊ ပါးနပ်သူ၊ ခေါင်းတော်ညိတ် စိတ်တော်သိသူ ၀န်ထမ်းဆိုးတွေနဲ့ ကိုယ်ကျိုးသမား ၀န်ကြီးဝန်ကလေး၊ မန်နေဂျာ၊ ညွန်ချုပ်တွေ ပလဲနံပ သင့်စွာနဲ့ နိုင်ငံဘဏ္ဍာကို အပြိုင် ဘုန်းခဲ့လို့ တိုင်းပြည် အခု ဘယ်အခြေ ဆိုက်ခဲ့ရပြီ ဆိုတာကိုလည်း ၀န်ထမ်း တွေ အတော်များများ သိနားလည်စ ပြုလာပါပြီ။

သူတို့တွေ ၀န်ထမ်းတွေ ကောင်းမှ နိုင်ငံကောင်းမှာမို့ သူတို့ဝန်ထမ်းတွေ အမှန်မြင်လာပြီး အမှန်ဘက် ဥပဒေ စိုးမိုးရေး အတွက် အားပေးပူးပေါင်း ကူညီလာခြင်းကလည်း နိုင်ငံတိုးတက်ဖို့ အခါအခွင့်ကောင်းကြီး ဖြစ်ပါသည်ကော။


တချို့က ပြောခဲ့ဖူးပါတယ်။ သံကန့်လန့်ကာ တိုင်းပြည်။ အရာရာ ပိတ်ဆို့ထားသော တိုင်းပြည်  ။ စစ်အာဏာရှင် စနစ်ဆိုးအုပ်စိုးသော တိုင်းပြည်၊  အမှန်တရားတို့ ပျောက်ဆုံးနေသော တိုင်းပြည် စတာတွေနဲ့ စုံနေတာပေါ့လေ။
ဖြတ်သန်း ဖြစ်တည်ခဲ့ဖူးသော မြန်မာပြည်ရဲ့ အလှမ်းမကွာသေး ဆေး မခြောက်သေးသော သမိုင်း လတ်လတ်ဆတ်ဆတ်ကြီးကို  တပ်အပ်ကြီး ဝေဖန်သံတွေ ညံနေခဲ့တာပေါ့၊

ပြောမယ် ဆိုလည်း ပြောစရာပါပဲ။ ကျနော်တို့ နိုင်ငံဟာ အလွန်ကို ၀မ်းနည်းကြေကွဲဖွယ်ကောင်းတဲ့ သမိုင်းနေ့စွဲတွေ၊ အလွန်ကို နှမြောဖို့ကောင်းတဲ့ နှစ်သက်တမ်းတွေ၊ ဖြတ်သန်း ဖြစ်ပေါ်ခဲ့ဖူးတာကိုး။

အလွန်ကို ခြောက်ခြား ကြောက်လန့်စရာကောင်းတဲ့ စစ်အာဏာရှင် ယန္တားရားကြီးက ခေါင်းဖြတ်စက်ကြီး ပမာ နိုင်ငံသားတိုင်းရဲ့ ဂုတ်ပိုး ဇက်ပိုးပေါ် ၀ဲပျံလူးလြာ သဲထိတ်စွာနဲ့ ဖြတ်သွားခဲ့ဖူးတာကိုး ................................။

အဲဒီလို  ညဉ့်နက်နက် ၊ အသဲထိတ်မတတ် ခြောက်ခြား စရာကောင်းတဲ့ အိမ်မက်ဆိုးတွေ  ဘယ်လောက် မက်မက်၊ ညဉ့်ခွေးတွေ ဘယ်လောက် အူအူ ၊ အချိန်တန်ရင် အင်မတန် သာယာတဲ့ မနက်ခင်း ဆိုတာ လာမှာပါပဲ။

အာရုဏ်ဦး ရောင်ခြည်နဲ့ အတူ အိပ်တန်းက နိုးထလာတဲ့ ကျီကျီတာတာ၊ ငှက်သံလေးတွေ၊ မနက်ခင်း သုတ်ဖြူးဆော်လာတဲ့ အေးမြတဲ့ လေညင်းလေးတွေ၊ မြူနဲ့အတူ ဆိုင်းနေတဲ့ နှင်းငွေ့လေအေးအေး လေးတွေ၊ နေခြည်စမ်းစ သစ်ပင်သစ်ရွက်တို့ပေါ် တင်ကျန်နေတဲ့ နှင်းစက်လေးတွေက တလက် လက် တောက်ပ နေတတ်တဲ့ အင်မတန် ကြည်နူးဖွယ် မြင်ကွင်းလေးတွေ က ညဉ့်နက်နက်ကြီးဖြတ်သန်းသွားပြီးချိန်ကျရင် ပေါ်လာမှာပဲလေ။
အသေအချာပါ။

ညဉ့်နက်ပြီးတိုင်း အာရုံမိုးသောက်ဆိုတာ လာမှာပါပဲ။
ဒါသဘာဝ   ပါ.......။

ကျနော်တို့ ခါးသည်းလှတဲ့ ညဉ့်တွေကို ဖြတ်ခဲ့ဖူးပါပြီ။
ညဉ့်နက် မှောင်မှောင်ကြီး၊ ခြောက်ခြား စရာ အိမ်မက် ဆိုးဆိုးကြီးတွေလည်း မက်ခဲ့ဖူးပြီ။
၊ တဂေါက်ဂေါက် ခေါက်တတတ်တဲ့ ဂတ်စတာပို တံခါးခေါက်သံတွေ ကြားမှာလည်း ရင်ထိတ်ဖူးပြီ။
တဘုတ်ဘုတ် ဖြတ်မောင်းသွားတဲ့ ငရဲစေတမာန် ယာဉ်သံတွေ နောက်  လက်ထိပ်သံ တချွှပ်ချွပ်နဲ့ ငိုရှိုက်သံ တသဲ့သဲ့တွေ ကြားေ၀၀ါးသွားတဲ့ မျက်ရည်ရွှမ်းသော အလွမ်းညတွေ၊    ညဉ့်မိုက်မိုက်နဲ့ အလွမ်းမြင့်မိုရ် အပြိုင် ထိတ်ငိုမိတဲ့  မြင်ကွင်းတွေလည်း များခဲ့ပြီ။

၊ ခါးသည်းလှတဲ့ ဆောင်းအိမ်မက် မုန်းမုန်းကြီးတွေ ၊
ပျောက်ဆုံးခဲ့တဲ့ အနာဂတ်တွေ၊
နောက်ဆုံး မဟုတ်တဲ့ အမိန့်တွေ၊
ကျဆုံးသွာတဲ့ သူရဲကောင်းတွေ၊
ကြိမ်မီးအုံးတဲ့ လက်သီးဆုပ်သံတွေနဲ့ နံရံကို ပစ်ပေါက်လိုက်တဲ့ ဓါးမြောင် တလက်လက် ဒါးမြီးတယမ်းယမ်း တို့ဟာ ပြည်သူတို့ အတွက် ဒီနေ့ကို ခင်းပေးခဲ့တဲ့ လမ်းခင်းကျောက်ဆိုင် ကျောက်စု ကျောက်မှုန် ကျောက်သွေး ပုံ။

ဒီလို အမုန်း၊ အနာ၊ အမျက်၊ အရှက်နဲ့ အသံတိတ်၊ အံကြိတ်သံတွေ လတ်ဆတ်စွာ ရင်ထဲမှာ ကိန်းအောင်းရင်းနဲ့ ပဲ  ။ အိမ်ပြတင်း တံခါး ကြားတွေက ထိုးဖေါက်စိမ့်ဝင်လာတဲ့ အာရုံဦးနေခြည်လေးတွေ တဖျတလှ .............မျက်ရည်စ ၀ိုင်းဝိုင်း ကြည်နူးချင်စိတ် တပိုင်းနဲ့ လှမ်းမြင်နေရပါပြီ၊
ယုံကြည်နိုင်ဖွယ် မရှိခဲ့တဲ့ ကျောင်း တပိုင်း ဘ၀သင်ခန်းစာတွေကြောင့် အာရုံဦးနေခြည်နုနုကိုပဲ ကျနော်တို့ သံသယတွေနဲ့ ရှုနေကြရတယ်။ နေခြည်နုနုကနေ နေ၀င်အမှောင်ထုကို ရုတ်ခြည်းများ ကူးလွန့်သွားလေမလားပေါ့   ............

ပုပ်သိုးနံအောက် နေတဲ့ လေညစ်တွေ ထက် သန့်ရှင်း လတ်ဆတ်တဲ့ လေထု ငွေ့ငွေ့လေးကို ကျနော်တို့ စတင် ရှုရှိုက်ခွင့် ရလာပါပြိ။ မည်းမှောင်သိပ်သည်းနေတဲ့ အမှောင်ထုကနေ ရောင်ခြည်ဦးတို့ဖြာဝင့်လာတဲ့ အလင်းစူးလေးတွေ ကနဦး ထိတွေ့ခွင့် ရလာပါပြီ။
ဆွံ့နေတဲ့ နှုတ်တွေ အတွက် ထက်မြက်တဲ့ စကားလုံးတွေ ရွေးသီဖို့ စဉ်းစားရကောင်းမှန်း သိလာပါပြီ

တုန့်နေတဲ့ ခြေလှမ်းတွေ အတွက် လှမ်းတက်နိုင်မယ့် ခွန်အားတွေ မွေးမြူနိုင်ဖို့ စိတ်ဓါတ်တွေ ထက်သန်လာပါပြီ။

ကွဲကွာနေတဲ့ ရင်ဝယ်သားတွေ ပြန်ဆုံနိုင်ဖို့ ပေါင်းကူး တံတားတွေ ပဏ္ဍက်တွေ ချလာပါပြီ။
ပြာလဲ့ဖို့ တာဆူလာတဲ့ ကောင်းကင်ထက်ဆီက ပုဇွန်ဆီရောင် ငွေမှင်အနားကွပ်နဲ့ တိမ်စုစုလေးတွေအောက် အပြာရောင် လေဟာပြင် ကောင်းကင်ကြီးက ပြာလဲ့လဲ့ အလင်းလေးတွေနဲ့ ငြိမ်းချမ်းတေး သဲ့သဲ့လေးတွေက စီရရီ ဆင့်ရရင့် တင့်လာတော့မည်။
ကျနော်တို့ မျက်ဝန်းထောင့်မှာ ကြည်နူးလွန်းတဲ့ မျက်ရည်ငွေ့တွေ တဝေ့ဝေ့နဲ့ တ၀ဲဝဲ။

ယိုစီးကျမတတ် သျှံဝိုက်လာတဲ့ ဒီမျက်ရည် စက်လေးတွေကလေ ။ နှစ်ပေါင်းများစွာ၊ ရက်ပေါင်းများစွာ၊ ညပေါင်းများစွာ မက်ခဲ့ဖူးတဲ့ အိမ်မက်လေးတွေ ကို ထင်းထင်း မြင်ခွင့် တစိတ်တပိုင်းကြောင့် ပျော်လွန်းလို့ ယိုစိမ့်ထွက်လာတဲ့ နှလုံးသားရဲ့ အပျော်မြစ်ငယ်ပါ။
အင်း .............င်း ............င်း.................င်း.......................င်းးးးးးးးးးးးးးးးးးးးးးးးးးးးးးးး

ဒါပေမယ့် လည်းလေ ........ဒဏ္ဍာရီထဲက မသေသော ဘီလူး တချို့က အစွယ်လေးတွေ တလှစ်လှစ်နဲ့ လူ့ရွာကို မျက်စောင်းတွေ တခဲခဲ လုပ်နေတဲ့ သတင်းကလည်း ဟိုက သည်က ၊ လူစိမ်းတို့ မျက်လုံးတွေ အရောင်တောက်နေကြသေးတယ်။

လူစိမ်းတို့ ဆိုင်ကယ်သံတွေ အိမ်ရှေ့မှာ တ၀ဲဝဲလည်နဲ့ ဖြစ်နေချိန် အခု ည အမှောင် မိုးစက်တွေ တဖြောက်ဖြောက်နဲ့ လမ်းပေါ်က တဘုတ်ဘုတ်တို့ ရောနေချိန်လေးမှာ ကျနော်  ကျနော့်  အဖေရဲ့ ဒိုင်ယာရီ စာအုပ်လေး ကို ယူဖတ်လိုက်မိတယ်။

ကျနော် မျက်ရည်တွေ ဝေ့ချင်လာတယ်။ ဖခင်တယောက်ရဲ့ အဲဒီအချိန်က ခံစားချက်ကို သိပ် ဂရုဏာသက်မိတယ်။ သူ ဒီကဗျာကို ရေးနေချိန် က  ကျနော် ဟာ  သံတိုင်တွေကန့်ထားတဲ့ လူ့ငရဲ ခန်း ငယ် တခုမှာ တယောက်ထဲ  လေ။

နေမျိုးဇင် ရဲ့ အဖေ ဖခင် ဦးငွေဇင်က  သူ့ ဒိုင်ယာရီစာအုပ်ငယ်လေးထဲမှာ အခုလို ရေးထားတယ်။
သူ့စာလေးကို ကျနော် စဖတ်လိုက်ချိန်မှာ အိမ်ရှေ့မှာ ဆိုင်ကယ် ရပ်သံလိုလို ကြားလိုက်ရတယ်။ ကျနော် ရင်မခုန်တော့ပါ။

  အဖေ့  ကဗျာလေးတွေကို ကျနော်ဆက်ဖတ်လိုက်တယ်။ လူစိမ်းတွေ  အိမ်ရှေ့မှာ ရောက်နေ နေပေါ့။

   အဖေများ ရင်ခုန်နေပြီလား မသိ။

ကဗျာ့ခေါင်းစဉ်က   သားဗိုလ်ကြီးဟောင်း နေမျိုးဇင် သို့ အမှတ်တရ  ..................တဲ့။



မိဘ ဧ။် သောက

ချစ်သောဖေဖေ ဦးငွေဇင် ဧ။် သားအတွက် ရတက်မအေးစဉ်က ကဗျာငယ်

၁။  ကြားလျှင် ကြားခြင်း
      ဤသတင်းက.....
      ရင်တွင်း မချိ
      ခံစားမိ၍
      ငါဧ။် နှုး
      အပူ ဆုံးမို့
      မီး အုံး လောင်စာ မြိုက်သည့်နှယ်။
၂။  မြကွန်း    ခေါ်ကြ
     ဥက္ကဌ နှင့်
     ဌါန  အက်(စ်)ဘီ
     ဆွေလင်း  မည်သည့်
     အနှီ နှစ်ဖေါ်
     လာ၍ခေါ်တော့
     ရွှေလှော်မျက်ရှု
     သားရွှေဥလည်း
     ယခု ချက်ခြင်း
    သူ မငြင်းဘဲ
     စင်းစင်း ထ၍ လိုက်ရပြီ။

၃  နှစ် ၊ လေး ၊ ဆယ့်တစ်
    ညနေ ဖြစ်ဧ။်။
    သားချစ်မျက်နှာ
    ငါ ပြန်လာတော့
    အိမ်မှာ မမြင်
    အိမ်ကို ကြဉ်၍
    သူလျှင် ဆက်ဆက်
    ခရီးထွက်သည်
    ဘယ်တွက် ပြန်မလာပါလိမ့်နော်။

၎။ သူမောင်း၍သွား
    သူ့ ဂျစ်ကားက
    ဖေ့ သား မပါ
    အိမ်ပြန်လာတော့ .....
    စိတ်မှာ မရွှင်
    မကြည်လင်ဘဲ
    ပူပင် သောက
    ငါ ရောက်ရသည်
    သား က ဘယ်ဆီ ရောက်နေသနည်း.....။

၅။ ခေါ်သည့် နေ့က
    ဘာကိစ္စ ဟု
    ပြောပြ ဖို့ ငြင်း
    ဦးဆွေလင်း  က
    မေးခြင်း စုစု
    ခွင့် မပြုတော့
    ဘာမှု နဲ့ဖမ်း
    ဘယ် စခန်းမှာ
     စံမြန်းနေလဲ
    မသဲကွဲ ၍
    ရင်ထဲ မအေး
    သောက မွေးသည်
    သားလေး အတွက် ပူပါ ဘိ။

၆။ ပူလောင် ခံစား
    စိတ်ထွေပြားတော့
    ငါ ကား မရွှင်
    မွေးမိခင်လည်း
    ဘ၀င် နွမ်းလျ
    ပင်ပန်း လှ၍
    မှောင်ည များစွာ
    အိပ်ပျက်လာပြီး
    အစာ မစား
    ပိန်ချုံးသွားပြီ
    ချစ်သား အတွက် ခံစား ချက်.......။

၇။  သား ပြန် မရောက်
     စိတ်တွေ နောက်တော့
     ပြေပျောက် လိုငြား
     ယတြာများဖြင့်
     ထွန်း ထား ဆီမီး
     ထိန်ထိန် ညီး တည့်
     ပုတီး ကိုစိပ်
     မီး ကို ပိတ်၍
     တိတ်တိတ် ဆုတောင်း
     အောင် စေကြောင်းဖြင့်
     ရန်ပေါင်း ငြိမ်းစေ
     ဆု ပန်ခြွေ သည်
     ရန်တွေ ကျွတ်ကျွတ် လွတ်စေ သတည်း

     ငွေဇင်
၈/၄/၂၀၁၁
၂-၄-၂၀၁၁  စနေနေ့က အဖမ်းခံရသော သား  နေမျိုးဇင်  သို့။
အဖမ်း ခံရပြီး၊ ရက်သတ္စ္တ တစ်ပတ် အကြာတွင် ဤ ကဗျာကို ရေးပါသည်။
သား အလွမ်းပြေ ကဗျာ ဟုဘဲ ဆိုပါစို့။
.................................................................................................
အဖေက သူ့ ဒိုင်ယာရီလေးမှာ ဒီကဗျာလေးကို ရေးထားသည်။ စာသား အချို့နေရာလေးတွေမှာ မှင်လေးတွေ ၀ါးနေ ကွက်နေသည်။ အဖေ့ မျက်ရည်စက်များ လော။ အမေ့ မျက်ရည် စက်များ ကျဆင်းထားသည်လော မသိ။ သေချာတာကတော့ ကျနော် ထောင်က ထွက်လာချိန် အဖေရော အမေပါ အတော် အိုစာ ပိန်ကျနေသည်ကို သတိပြုမိလိုက်ခြင်းပင်။

ကျနော် အဖေ့ ကဗျာလေးကို ဖတ်ရင်း စာရိုက်ရင်း မျက်ရည်တို့ ဝေ့၀ဲ လာမိပါသည်။
ယခု ဆယ်နှစ်သား ရှိလာပြီဖြစ်သည့် ကျနော့် သားလေး ကြီးပြင်းလာချိန်တွင် ကျနော် ကိုယ်တိုင် ဒီလို သား အလွမ်းပြေ ကဗျာမျိုး မရေးလိုတော့ပါ။ သား ငယ်လေးကိုလည်း ကျနော်တို့ ဖြတ်သန်းခဲ့ရသည့် ဆောင်းအိမ်မက် ကြမ်းကြမ်း၊ လမ်းဝင်္ကပါ နာနာ ၊ ဟာတာတာ အနာဂတ် တွေနဲ့ မကြီးပြင်းစေချင်တော့။ ပေးဆပ်လို့ ရသမျှ အားလုံး ပေးဆပ်ပြီး သားတို့ အပါအ၀င် နောက်မျိုးဆက်သစ်များ အတွက် အနာဂတ်လှလှလေးတွေ လမ်းခင်းပေးနိုင်အောင် ကြိုးစားသွားမှာပါ ..................................................................................

နေမျိုးဇင်
(ဇူလိုင်လ ၂၆ ရက်၊ ၂၀၁၂)