ဆရာတင်မိုးရဲ့ကဗျာဗုံး

ဆရာတင်မိုးရဲ့ကဗျာဗုံး

by Victor Tan on Saturday, July 28, 2012 at 4:26am ·

ဆရာတင်မိုးရဲ့ကဗျာဗုံး

ဆရာတင်မိုးကိုဓါတ်စာကျလို့
ဖတ်လာရတဲ့သူ့ကဗျာတွေ
အထပ်ထပ်အခါခါပါပေ…။

ပြည်သူထိရင် ဓါးကြည့်
အားရှိတဲ့ကဗျာတွေ
သူရေးခဲ့ပါသလေ
ပြည်သူတွေအနေဆင်းရဲ
အစားဆင်းရဲ အသွားဆင်းရဲတာတွေကို
တအားအတင်းပဲ ရဲရဲတောက်
ဖြဲဖြဲချောက်လဲ မကြောက်ပဲရေးခဲ့တာ
ကဗျာဆရာ တင်မိုးပါ…။

ရှစ်လေးလုံး ရေးမဆုံး
သူကဗျာတွေက ဗုံး။

ကဗျာဗုံး လုံးလုံးဖေါက်
မီးဟုန်းဟုန်းတောက်…။

ဗုံးကဗျာကိုသူဖေါက်သွား
ပေါက်အားကောင်းတဲ့ကဗျာဗုံး
ဖတ်ကြည့်ကြပါအုံး…။

ဆရာတင်မိုးရဲ့ ရေးဖေါ်သူငယ်ချင်း
စာသင်ဖေါ် စာသင်ဖက် ကျောင်းဆရာ ကျနော်ပါ

တက္ကသိုလ်ဘုန်းကြွယ် (ဇူလိုင် ၂၇ ၂၀၁၂)


အောင်ပွဲဆီသို့ချီတက်စို့(တင်မိုး)

ဒီကမ္ဘာမှာ
စစ်အာဏာရှင်လွှမ်းမိုး
လူ့တန်ဖိုးကွယ်ပျောက်
အကြောက်တရားနဲ့အုပ်ချုပ်
ဒူးတုပ်နေရတဲ့နေရာ
မြန်မာနိုင်ငံဆိုတာ ရှိပါတယ်…။

ပါးစပ် နဲ့ နားမျက်စိတွေ ပိတ်
အဟိတ်တိရစ္ဆာန်လိုဆက်ဆံ
မမှန်မကန်တွေကို မြန်မြန်ဆန်ဆန်လုပ်
ဒူးနဲ့မျက်ရည်သုတ်နေရတဲ့
ဗိုလ်ချုပ်တွေရဲ့ ကျေးကျွန်ပမာ
မြန်မာတမျိုးသားလုံး
လူဖြစ်ရှုံးနေကြပါတယ်…။

နိုးထကြကုန်လော့…။
တောင်ဟုန်ပြင်းပြင်း ဂဠုန်မင်းရိုက်ခတ်သံလို
ခွပ်ဒေါင်းအလံကိုလွှင့်
ရဲရဲရင့်ရင့် တိုက်ပွဲဝင်ကြကုန်လော့….။

တိုက်ရဲမှ သမိုင်းပြောင်
အကျဉ်းထောင်က လွတ်လိမ့်မည်…။

အကြောက်ပိုးထိုး ခေါက်ရိုးကျိုးဒူးထောက်
ဖိမ့်ဖိမ့်ကြောက်နေလျှင်
ဘယ်တော့မှ မလွတ်မြောက်နိုင်…။

လာကြ..ဆုံကြ.. အုံကြွစုဝေး
သွေးချင်းညီညွတ် ဒေါင်းလိုခွပ်လော့…။

လွတ်မြောက်ရေး…လွတ်မြောက်ရေး…
စစ်ဖိနပ်တဂေါက်ဂေါက်နဲ့
စစ်တပ်အောက်က လွတ်မြောက်ရေး…
အရေးတော်ပုံ အောင်ရမည်…။

ကြောက်သွေးဖောက်ထုတ် နောက်မဆုတ်နဲ့
နောက်ဆုတ်နောက်ဆုတ်နဲ့
ကြောက်ရုပ် မပြနှင့်…။

ရှေ့တလှမ်းတိုး…ရှေ့တလှမ်းတက်
ယမ်းထိုးတဲ့လက်ကို
ဖမ်းချိုးဖျက်ပစ်ပြီး
လူထုခေတ်တည်ဆောက်
လွတ်မြောက်ရေးရပြီး
အရေးတော်ပုံ အောင်ရမည်…။

တင်မိုး (၁၆-၉-၂၀၀၂)