သတင်း
စိုးဝင်းရှိန် မောင်ရှင်
ကိုထွန်းဝေ
မိတ်ဆွေများအားလုံးခင်ဗျာ အမျိုးသားဒီမိုကရေစီအဖွဲ့ချုပ်ပါတီ (ရုံးချုပ်) ၌ ကျင်းပပြုလုပ်ခဲ့သော လူထုခေါင်းဆောင် ဒေါ်အောင်ဆန်းစုကြည်၏ ၆၇ နှစ်မြောက် မွေးနေ့ (မြန်မာနိုင်ငံအမျိုးသမီးများနေ့) အခမ်းအနားတွင် တတိယအကြိမ်မြောက် အညတရသူရဲကောင်းဆုရရှိသူ ဆုရှင် (၅) ဦးအား ဆုချီးမြှင့်ပေးအပ်ခဲ့ပါသည်။ ဆုများအား အမျိုးသားဒီမိုကရေစီအဖွဲ့ချုပ်ပါတီ၏ နာယကများဖြစ်ကြသော ဘဘဦးတင်ဦးနှင့် ဘဘဦးဝင်းတင်တို့က ပေးအပ်ချီးမြှင့်ခဲ့ကြပါသည်။ ဆုအနေဖြင့် ကျပ်ငွေ (၁၀) သိန်းနှင့်အတူ အညတရသူရဲကောင်းဆုတံဆိပ် ကိုပါ ပေးအပ်ချီးမြှင့်ခဲ့ပါသည်။ ဆုရှင်များကိုယ်စား ယခုနှစ်အစောပိုင်းက ထောင်မှ ပြန်လည်လွတ်မြောက်လာခဲ့သော ဇိုမီးအမျိုးသားကွန်ဂရက်မှ ပူအန်ထော်နီကပ်ခန်ခွာ က ကျေးဇူးတင်စကား ပြန်လည်ပြောကြားခဲ့ကြောင်း သိရှိရပါသည်။ ဆုများအား ကာယကံရှင် ကိုအန်ထော်နီ နှင့် မလှလှမော် တို့ နှစ်ဦးသာ ကိုယ်တိုင်လက်ခံရယူနိုင်ခဲ့ပြီး ဆရာတော် ဦးခေမာစာရ ကတော့ အစောပိုင်း ဆက်သွယ်မေးမြန်းထားမှုအရ တရားရိပ်သာဝင်နေကြောင်း သိရှိခဲ့ရပြီး၊ ဒေါက်တာကျော်ကျော်နှင့် ကိုလက်ျာထွန်းတို့ နှစ်ဦးမှာတော့ လက်ရှိထောင်ကျခံနေရဆဲ ဖြစ်ကြောင်း သိရှိရပါသည်။ ကျနော်တို့ ကော်မတီက လက်ခံရရှိထားသော အခမ်းအနားဓတ်ပုံများနှင့်အတူ Mizzima သတင်းဌါန၏ သတင်းဖော်ပြချက်ကိုပါ ပေးပို့အပ်ပါသည်။ ကော်မတီအနေဖြင့် သြဂုတ်လ(၅) ရက်နေ့တွင် တတိယအကြိမ်မြောက် အညတရသူရဲကောင်း ဂုဏ်ပြုပွဲအခမ်းအနားတရပ် အား ဂျပန်နိုင်ငံ၊ တိုကျို မြို့တွင် ကျင်းပသွားနိုင်ရန် စီစဉ်လျှက်ရှိပါကြောင်းနှင့် အဆိုပါအခမ်းအနားအတွက် သူရဲကောင်းဂုဏ်ပြု ကဗျာများ ပေးပို့ပေးနိုင်ပါရန် နှင့် အခြားဆောင်ရွက်စေလိုသော အကြောင်းအရာများအား အကြံပြုပေးကြပါရန် ဖိတ်ခေါ်အပ်ပါသည်။ ကော်မတီအနေဖြင့် ငွေစာရင်းရှင်းတမ်းနှင်အတူ နောက်ဆုံးရ အလှူရှင်စာရင်းအား မကြာမီအချိန်အတွင်း ထုတ်ပြန်ကြေညာပေးသွားမည်ဖြစ်ပြီး စတုတ္ထအကြိမ်မြောက် ဆုချီးမျြင့်နိုင်ရေးအတွက် အရှိန်အဟုန်မပျက် ဆက်လက်ကြိုးပမ်းသွားမည် ဖြစ်ပါကြောင်း အသိပေး အကြာင်းကြားအပ်ပါသည်။ အမျိုးသားရေး စိတ်ဓါတ်အပြည့်ဖြင့် ငွေကြေးထည့်ဝင်လှူဒါန်းခဲ့ကြသူများ၊ ရန်ပုံငွေခရီးစဉ်များတွင် လိုက်ပါအားပေးခဲ့ကြသူများအားလုံး နှင့်တကွ ဤလုပ်ငန်းစဉ် အောင်မြင်ရေးအတွက် အသွင်သဏ္ဍန် အမျိုးမျိုးဖြင့် အဖက်ဖက်က ၀ိုင်းဝန်းပံ့ပိုး ကူညီခဲ့ကြသူများ အားလုံးအား အထူးပင် ဂုဏ်ယူလေးစားရပါကြောင်းနှင့် ကျေးဇူးအထူးတင်ရှိရပါကြောင်း ကော်မတီကိုယ်စား ဂါရ၀ရှေ့ထား အသိပေး ပြောကြားအပ်ပါသည်။ လေးစားစွာဖြင့် မင်းထက်ဇော် အဖွဲ့ဝင် အညတရသူရဲကောင်းဆုကော်မတီ ၂၀၁၂ ခုနှစ်၊ ဇွန်လ (၁၉) ရက်။ ဆုရရှိသူ ၅ ဦးမှာ အင်းစိန်ထောင်ရှိ ဦးခေမာစာရ (ခ) ကိုချမ်းသာ၊ မြင်းခြံထောင်ရှိ ဒေါက်တာကျော်ကျော်၊ သာယာဝတီထောင်ရှိ မောင်လက်ျာထွန်း၊ မြင်းခြံထောင်မှ လွတ်မြောက်လာသည့် မလှလှမော၊ ပုသိမ်ထောင်မှ လွတ်မြောက်လာသူ ကပ်ခန့်ခွာ (ခ) အန်ထော်နီ တို့ဖြစ်ပါတယ်။ တဦးလျင် မြန်မာကျပ်ငွေ ၁၀ သိန်းနှင့်အတူ အညတရသူရဲကောင်းဆုတံဆိပ်ပါ ပူးတွဲပေးအပ်ခဲ့ပါတယ်။
No comments:
Post a Comment